客家師傅話（鈴仔部分）

緒言 
第一部份普通鈴仔（照筆劃順） 
第一部份普通鈴仔（照筆劃順）答案
第二部份普通鈴仔（照筆劃順）第二部份
普通鈴仔（照筆劃順）答案

序

　　早時的先祖在無報紙、雜誌、電影、電視、收音機、電唱機、電腦網路遊戲等个時代，愛仰般調節疲勞、枯燥無味个生活？佢等就自然會尋機會想出在大樹下聊涼時，在店亭下打嘴古時，來挨絃仔唱山歌講古、講笑話、師傅話、做鈴子揣，來唱、來大鬧一番、大笑一番，消除疲勞痶。

　　在農村無讀過書个人，就係文盲者个生活調劑中，想出唱、講、打、跳等來搞笑，使生活有變化，造成歡樂个氣氛。特別在一年一度个年宵節迎花燈活動時，辦燈「謎」為最高潮。「燈謎」就係客家人个揣鈴仔。這種生趣个康樂活動，能調劑精神放鬆情緒，有莫大个貢獻，功不可滅。

　　鈴仔有幾下種：有普通鈴仔、山歌鈴 字鈴。普通鈴、鈴仔 山歌鈴仔係，無讀過書毋識字个人：聽來學來个也有自己想自己編出來个，大部分係代代相傳个。這種鈴仔較簡單、較容易學、較容易暸解，也較容易揣出來。

　　另外一部分有錢人，佢會買書讀，有經書、歷史書、傳仔小說看，佢等也會去學書法、畫圖、題詩作對來消遣時間，當作娛樂調劑生活。

　　本集係為著客家文化个傳承著想，將聽到想到个「鈴仔」寫成。現在青年可能「鈴仔」係麼个？知个人可能無幾多。祖先傳下來這種恁有意思个頭腦運動，恁靚个話盡少聽到。

　　近年來這種个客家話，強強會毋見掉，所以較大膽用不流暢較白的客家語寫出來。目的係愛將祖先留下來个話語傳承下去，給老一輩再想起頭擺个生活情景回憶無窮。也愛提醒客家人在屋下愛教下一輩學會講客家話，學會讀客家字，挽回客家人失落阿姆話个危機，講客家話來復興客家文化。

　　請多指教。