我佇黃昏的水邊等你

推薦序

用媠氣的台語寫出詩的春天──讀顧德莎台語詩集《我佇黃昏的水邊等你》

　　顧德莎開始用台語寫詩，是這兩三年的代誌。照伊的講法，伊自細漢就蹛佇台語生猛的菜市仔邊，讀小學三年了後搬去眷村蹛，改用華語腔口講話，一直到出社會來台北做工課，才因為去卡拉OK唱歌的關係，發現台語的媠氣，行轉來學習台語文的路頭。到了2015年，伊參加「梅山文學營」，受著路寒袖、林沉默的指導，寫出第一篇作品〈返鄉〉；2016年，伊佮朋友共組「台文讀冊會」，認真唸讀林央敏的詩集《胭脂淚》、小說《菩提相思經》，那讀那唸，那來那對台語寫作有趣味，嘛按呢開始認真台語詩的創作。

　　雖然寫作的時間無長，毋過顧德莎的台語詩卻是真幼路，真有看頭。這本《我佇黃昏的水邊等你》就是伊兩三冬來創作成果的總展現，佇這本詩集內底，伊寫花草、寫感情、寫病疼、寫土地、寫眾生，透過無相仝的角度，用詩的語言描寫伊的感觸、伊的心情，遮的詩篇總數有九十外首，可見伊創作誠勤，才情誠懸，才有法度寫出遮爾濟好作品。

　　顧德莎的台語詩，參濟濟台語詩人無仝的，是伊誠愛「拈花惹草」。這本詩集內底寫花的詩作，自頭到尾有袂少篇，「輯一」攏寫花草，「輯四」嘛攏是花，另外每輯嘛濟少會當看著花的形影。這是顧德莎詩篇的特色之一，自來台語詩人多數用現實主義的技巧表現社會真實，像伊按呢愛花、看花、寫花的詩人無濟，像伊按呢共每伊蕊花的色水攏表現出來的詩嘛無濟。就像〈花開的聲音〉這首詩寫的：

　　每一蕊花攏有伊的色水
　　每一種色水，攏是春天
　　等下一陣風來
　　攑頭，徛出來

　　伊將各種花寫落去詩內底，毌管普通抑奇巧，見笑草、刺查某、蓬鬆花、油桐花、燭仔花、將軍棉、七里香、瓊花……，攏寫出無仝的色水佮姿勢，予人讀著心適、快活，嘛會鼻著花的芳味，看著台語詩的春天。

　　因為受著台語流行歌詞的啟示，加上顧德莎這三年來全心唸讀台語作品的關係，對台語聲調變化的體會愈深，對音樂性的把握愈強，伊有誠濟詩宛然是歌，誠適合唸讀，嘛會當譜曲做歌。紲手舉這首〈無言花〉做例：

　　將欲寫的批，掛佇樹椏
　　一萬字會使編做幾首詩？
　　幾首詩會使代替
　　無寫出來的字？
　　寫佇樹頂的字
　　會恬恬飛落塗跤
　　有人看過
　　無人讀過
　　仝款葬做伙
　　一堆字的屍體

　　花佇樹頂唌人目
　　花落樹跤隨人踢
　　自頭至尾
　　無聲無說

　　這首詩押韻誠自然，換韻誠媠氣，「批」(phue)、「椏」(ue)、「替」(thuè)、「過」(kuè)、「伙」(hué)「尾」(bué)、「說」(sueh)，攏壓「ue」的主韻，「體」(thé) 精差無偌濟，整體唸出來有輕聲細說的感覺佮情境；主韻中間安插次韻，「字」(jī)佮「詩」(si)用「i」韻，「目」(ba̍k)佮「踢」(that)用近倚的「a」韻，互相交插、應聲，成做一篇動人的歌詩。這是顧德莎佇這本詩集內底用情用心上濟的所在，這類的詩有袂少，親像〈蓬鬆花〉、〈看雲〉、〈讀詩〉、〈寫蹛水邊的批〉、〈落落水面的花〉、〈燭仔花〉、〈花開的聲音〉、〈水照花影〉……等等攏是佳篇。

　　寫花、寫雲、寫詩以外，顧德莎嘛寫病疼佮人生世事。〈佮死神行棋〉有兩篇，一篇用「圍棋」來比喻佇陰陽對決崁站的病人無依偎的疼，一篇用「象棋」來比喻病中想盡辦法共死神車拚的意志。兩篇相對照，會予你看著詩人參破生死的生命觀點。〈浮塵眾生〉寫伊踮病房看落雨天的窗仔外的覺悟，窗外窗內攏是「勞苦」，親像「一粒浮塵 暫歇/ 往東往西 等神決定」，詩的尾段「向望浮塵/ 會使起身/ 回轉大地/ 完成一生」，寫出看破生死無常的哲理。閣較深刻的，是這首〈好日子〉：

　　你問我最近好無？
　　無畫圖讀冊
　　每工食飯啉茶
　　佇窗內看雲搬戲
　　無想將來，過去

　　時常一个人
　　綴一蕊雲
　　佇山路踅來踅去
　　雲軁過竹葉
　　向海的方向飛去
　　我的路彎彎斡斡
　　袂記得終點佇佗位

　　我誠好，免掛意
　　每工攏是好日子
　　看雲
　　聽雨
　　等暗暝

　　這是參破病疼，對人生徹底開破之詩。「每工食飯啉茶/ 佇窗內看雲搬戲/ 無想將來，過去」是一款看破生死、自得其樂的生命態度；「雲軁過竹葉/ 向海的方向飛去/ 我的路彎彎斡斡/ 袂記得終點佇佗位」，有王維「行到水窮處，坐看雲起時」，對應人生彎斡，無所驚惶的開闊；尾句「看雲/ 聽雨/ 等暗暝」特別精彩，人生的路途行到遮，已經是順其自然、順天應命的代誌。

　　誠歡喜會當代先拜讀顧德莎的這本詩集。我和伊初見，是佇台北齊東詩舍，2014年中秋前一工，彼工有我的新詩講座，每禮拜一擺，前後四禮拜，伊總是按時來聽，我講新詩內底的台灣想像、講詩的四个特性，毋知對伊後來寫詩有幫贊無？總是後來就看著伊寫的台語詩作，愈寫愈猛，便寫便好。伊的台語詩集《我佇黃昏的水邊等你》得著國藝會的獎助，會使得出版，這是誠無簡單的代誌，我讀伊的近百首的詩，感覺會著伊對台語詩的深情，伊的詩毋但是講究台語用字、用詞，而且注重詩的語言、技巧參情境。這本詩集親像開佇台灣土地面頂的花蕊，用媠氣的台語寫出詩的春天。