客語童話有聲書：阿姆～阿姆～天又落下來囉！

《客語童話有聲書：阿姆～阿姆～天又落下來囉！》

導讀與推薦序
【導 讀】一拖攞个問號？一連串的問號？
【推薦序】一枚煎粄補天穿 ／張淑玲

阿姆～阿姆～天又落下來囉！
1食到伸兩料甜粄
【華語】吃得只剩下兩塊年糕
2目珠緊線等甜粄
【華語】目不轉睛一直看年糕
3留來正月二十補天穿
【華語】留到正月二十日補天穿
4甜粄捲鹹菜
【華語】年糕捲酸菜
5打這床甜粄無恁該
【華語】蒸這籠年糕可沒這麼簡單
6天乜會穿空
【華語】天也會破個洞
7撞橫西片天个堵天楯
【華語】撞倒西邊的撐天柱
8天下大亂
【華語】天下大亂
9五彩石當靚
【華語】五彩石很漂亮
10又再天穿地漏
【華語】又再度天穿地漏
11尞天穿
【華語】天穿日放假
12钁頭敢開山打林
【華語】鋤頭敢去開山打天下
13阿姆～天又落一隻大空囉
【華語】媽媽～天又塌了一個大洞囉
14騙人毋識
【華語】騙人不懂
15講天缺
【華語】說神話
16無影無跡
【華語】無根無據
17三十六層天外天
【華語】三十六層天外天
18無看着啊
【華語】沒看到啊
19新个補天穿
【華語】新的補天穿故事
20愛從哪補起勢
【華語】要從哪裡開始補
21補嘴空
【華語】補嘴洞
22知得幾多？
【華語】知道多少？
23緊舞緊大空
【華語】越弄越大洞
24鬼生鬚人鬥个
【華語】鬼長鬍子是人接上去的
25一千擔
【華語】一大堆
26伸着个半料甜粄
【華語】剩下的半塊年糕
27顧該料甜粄轉
【華語】繞著那塊年糕打轉
28高不而將
【華語】不得已
29打加一床甜粄
【華語】多蒸一籠年糕

【附錄】
四縣腔拼音
海陸腔拼音
故事本文注釋

後記
本書製作群
作者簡歷


 

推薦序

一枚煎粄補天穿

張淑玲

　　客家「安徒生」捷明先生做阿公咧，緊來緊好講古，講个古緊來緊好聽。只愛大家愛聽，佢就輒常噩夜想愛變出餳人个作品，恁樣無閒洎杈係為着麼个呢？敢係佢應着客家个？好得捷明先生甘願做歡喜受，合緊做緊煞猛，正會人講个「湖鰍搵泥沙，緊搵緊大條」，變成客家界作品盡多个作家，正經係又期待又毋盼得捷明先生，總係創作好个文學作品分大家欣賞，為恩客家舂頭磕額。

　　這恁多年來，因爭客語復育有兜仔成績，肯用又曉用客語漢字書寫个作者加盡多，堆山塞海个作品乜分大家看到眼茫鼻花。毋過，這擺定着愛紹介佢這本盡無共樣个《阿姆～阿姆～天又落下來囉！》有聲童話書。

　　天穿日這客家當傳統个節日，對老頭擺个神話傳說講起，總係分大家當多个想像，毋過捷明先生認為天穿日有客家儆惜、惜福个優良觀念，又做得連接積極个時代環保意義，尤其係分過年期間無閒个大人有一隻無共樣个放尞日，確實係值得推廣个。

　　天穿日个神話傳說正經當生趣，毋過捷明先生為著分儆惜、惜福、環保、現代這兜意象做得充分連結，故所創造吔一隻新个天穿日故事，希望為着傳承兒童客家文學摎客語閱讀，編寫新面向个作品。除了用生趣个故事分細人仔認識客家傳統外，還有加入當多探討个話題，比論講：好食甜粄个阿明，同會打甜粄个阿姆，兩子哀有辦法補天無？無成阿明乜會補天穿？愛用麼个補喏？係用強力膠補無？抑係用甜粄補？又愛從哪補起勢喏？這一千擔的難題愛仰結煞喏？該斯愛看故事尋答案喔！

　　記得細細該下涯聽過阿公講个古……佢講頭擺頭擺女媧做人，又還愛代人類做媒人，故所變做係人類最早个阿姆。有一年水神共工摎火神祝融相打，共工打輸毋甘願就撞橫不周山，天崩下來、地也必忒，地泥變做海洋，女媧就負責煉石補天，解救人類，正有這客家人特別个節日──正月二十天穿日。就係為着感念女媧分人類个重生，愛承蒙女媧娘。阿公還會唸宋朝詩人李覯个詩句講：「一枚煎粄補天穿」，就係形容客家人過天穿个情形。宋朝以前个風俗，係用紅線䌈等甜粄擲到屋頂項，安到「補天穿」。

　　捷明講咧恁特別个天穿故事，你會聯想着麼个？涯還想着浪漫又感動人个古典小說《紅樓夢》又安到《石頭記》，故事裡背作者曹雪芹所寫个賈寶玉，原來係青埂峯下个一垤補天無分人選着，盡尾修練成仙个石頭，乜就係女媧補天所伸下來个該粒無用着个石頭，包尾正有這個摎林黛玉在靈河脣个木石情。這兜靚靚个古摎小說，係毋係分無閒又生活緊張个現代人加添一兜仔浪漫啊！儕儕會想着个就會無共樣，文學个美好就係學習摎想像，承蒙捷明先生又渡等兜去看客家文學最新最靚个風景。