平行時空中的烏托邦

　　〈平行時空中的烏托邦〉是台語書寫的中長篇小說，以現實中的國際局勢和臺灣的處境為投射的背景，採虛實交錯幽默諷刺的敘事風格，描寫奇妙的平行時空中，一群來自不同星球的臺灣人因緣際會，最後一起尋求寄託理想的烏托邦的故事。

作者簡介

陳建成

　　陳建成近年簡歷
　　．2018～2024年，〈臺江臺語文學〉季刊總編輯，臺南市政府文化局出版。
　　．主編〈府城的奇幻旅程——走揣小封神的傳奇〉，臺南市政府文化局出版。
　　．著作〈決戰西拉雅〉，首部由國立臺灣文學館出版台語劇本，後續臺南市政府教育局另出版台英雙語版，以及越南世界出版社以越　南文出版發行。
　　．著作〈王城劍獅／安平港的奇幻旅程〉，安平文教基金會出版。
　　．著作〈城東風華／東區，台南的新樣子〉，安平文教基金會出版。
　　．著作音樂歌舞劇本〈戀戀大員〉(謝銘祐作曲)，臺灣海翁台語文教育協會出版。
　　．著作〈浪人詩集〉，開朗雜誌事業有限公司出版。
　　．文化雜誌〈臺南都會報〉總編輯，獲2014年文化部最佳社區報獎。
　　．臺南市文化基金會〈王城氣度〉月刊總編輯，入圍2007第三十一屆行政院新聞局金鼎獎「最佳新雜誌獎」。
　　．李江却台語文教基金會主辦與出版，〈2008詩行〉第一屆台灣母語詩人。
 

平行時空中的烏托邦

一、彼粒星球頂的南島市

平行年曆2024 年，E003 星球，大員國南島市。柯明雅對老街的工作室出發，提早來到「平行時空傳送站」，習慣性的徛佇站前廣闊的大廳中央，一面等候來賓，一面恬恬觀賞彼座名叫「多維南島」的公共藝術作品。

明雅是在地的文化工作者，對南島市的人文歷史相當了解，原本佇外商的公司上班，因為想欲做家己有興趣的工課，過較自在的生活，所以辭掉頭路，佇舊城區古樸的老街裡開一間工作室，一个人校長兼摃鐘，專門承接文化相關的業務，久來漸漸建立出袂䆀（bái）的風評，時常予官方或者社團委託為外賓做文化性質的導覽。這條長長淡薄仔彎斡，有往過日治時代風情的老街，對多年來佮家族疏離，個性巴結（pa-kiat 堅強）習慣獨立行事的明雅來講，毋止通往工作的所在，嘛迵入伊內心的世界──當一日的工課結束，泡一杯咖啡或者沖一鈷茶，坐踮門邊看街頭恬靜的夜景出神、沉思，感受微風輕輕挲過頭毛，挲過彼欉對門口花台沿石柱一路旋藤去二樓的刺仔花，飄忽飛入燈火暗淡的街巷盡尾，會予伊有一款隨風遠離紅塵的感覺。若有月光，伊會共囥佇心肝頭猶溫溫的心事敨開，炤踮予過路的跤跡磨薄去的石磚，隨在伊勻勻仔思量；若無月光，簾簷下的風鈴拄著仔嘛會搖咧搖咧，幫伊召喚一寡仔回憶，或者溫暖的向望。

「多維南島」是鈦合金、瓷仔塗結合內部的精密機器，以南島古城佮原生動植物為主題所雕塑出來的動態作品，雕塑的基座保持常態性的沓沓仔自轉，中央代表南島市300 年前起造的王城建築景觀，會一面轉踅一面對周邊放射出苦楝、莿桐、茄苳、水茄苳（棋盤跤樹）、三跤鱉（魚木）……等虛擬的樹苗，慢慢生枝發葉成長為茂盛的大樹，紲落交鳴的鳥聲微微響起，樹尾搖咧搖咧飛出一陣一陣藍鵲、竹雞、繡眼畫眉、五色鳥……等美麗的飛禽，衝上大廳的天篷（thian-pông 天花板），向四面八方湠開、淡化消失去，然後所有虛擬的影像慢慢收合恢復原來的狀態，有節奏的重複收放。

明雅不止仔佮意這座融合古今、融合幼路的工藝佮先進科技的作品，來傳送站迎接賓客的時，攏會行倚去欣賞一下，若無趕時間會四箍輾轉巡巡看看，揣看敢有以前無注意著的細節。有時陣，若發覺初來的賓客經過予吸引去，好奇停跤落來，就會主動紹介予知影這是南島市傑出的藝術團隊佮機械、光學等專家，共同設計創作出來的，象徵南島市追求自然佮文明科技平衡發展的城市意象。