節錄自〈食个太平朝〉

食朝、食晝、食夜，就係過去存在適農業社會裡肚，相當重要个朝晨頭（早）、當晝頭（中）、暗晡頭（晚）這三餐。還係當當靠勞力為憑，像拖穀包用人力車載送、擎钁頭開園開埔、鍬紅毛泥、核擔……這兜，食米飯个人較耐做，為了係愛儲備體力轉化成勞力，客家古諺講：有恁會食，就有恁會做，無就講：有恁會做，就有恁會食。再講：食粥个細人仔毋耐噭，還係食燥飯个細人仔，較耐飽。仰會毋係呢？

莫講細人仔，連大人都共樣，食粥總係較遽肚饑。

時到如今，做人阿姆儕、心臼儕，朝晨頭有煮分全家，共下食早朝个家庭，怕緊來緊難得了。因爭，上班做事、時間作息，都異毋好安排，屋下人，各各出去買來食，較方便哪！省使佢等佢，等呀毋係，等得來菜冷飯冷，毋等也毋係，毋等就會變到佢食一齣、涯食一齣。特別係講現下个賣麵攤仔、西式个三明治漢堡店，三步一坎五步一間，總愛有錢毋愁無好食，有專業个人摎你準備便便，識聽人誚㸐講，該般專業人士，正係天下最篤實勤勞个心臼。

食朝食朝食个太平朝，正經个天下太平。早一息晝一息，本本有人做生理，乃至於，這下个後生人，夜夜睡晝晝䟘，連赴食朝就跈毋到，當然也莫論該太平朝了。佢兜食个喊著「早午餐」，兩餐打做一餐食，講食朝既經過晝缽喇，講食晝又異像還忒早，將就發明一個新名詞，喊著「早午餐」，比較地較年長个讀者朋友，聽到斯—會畫眼。

深深體悟到，年長般个該舫人較少人講了，年輕个該舫人，也聽毋到、聽毋識了，再毋煞煞造文記錄，強強會消失忒去了，值得一記。