活動倒數計時:  會員日全館9折起 詳情

  • 今日66折
  • 天天BUY
芎蕉大王

芎蕉大王

  • 作者:張捷明
  • 出版日期:2019/06/30
內容連載 頁數 1/3
客語文〈吾舅使牛〉
 
吾姐公歇个烏眉坑全係客家庄,涯識寫一篇客語文〈姐公使牛〉,分吾舅个外孫女練習客語朗讀。該篇雖然係用細人仔个目珠看姐公使牛,來紹介厥姐公──也就係吾舅,還有山田同民情風俗,實際項就係寫涯頭擺轉姐公屋下所看著个景緻。作品肚个人物隔了一代,兩代人看著个竟然共樣,表示這隻庄頭个生活、民情同景緻,五十年來差毋多凝凍無變,本本係純樸个世外桃源。
 
細人仔當歡喜,背熟絡後又當沙鼻个喊厥姆帶佢轉去,愛讀分厥姐公、姐婆聽。厥姐公就係吾舅,佢聽到哈哈笑,仰會就平常使一隻牛也做得變一篇文章。涯將該篇文章放到這後背,分涯再回味從細到這下吾舅使牛个印象,附小品文〈姐公使牛〉:
 
吾姐公歇在苗栗通霄,該位有山有水,還有當靚當靚个山田,田肚除忒蒔田,還會種番薯、種蘿蔔仔,過年前後還有一大片金黃色靚靚个油菜花。
 
今年過年,涯跈吾爺哀轉姐公屋下。行過修直个高速公路,又行過彎彎斡斡个縣道,再跈等通霄溪河壩,行到幾百年毋曾改變个細庄頭──烏眉坑。河壩脣个阿啾箭飛上飛下,帶等涯兜蹶上半山排姐公个山田。姐公个屋還在水頭个風圍背,田水上坵盤下坵,田脣路一碫過一碫,遠遠看著老牛拖等犁,背囊還企等幾隻幫手捉蟲仔个白鶴仔,老牛後背使牛个人就係吾姐公。
 
姐公戴笠嫲打赤腳,褲腳攝起來,一隻手使犁一隻手拉等牛索合揢等牛拂仔,嘴項緊喝「hodˋ qidˋ」無就「voˇ~」,指揮牛仔前進、後退、轉彎、暫停;成下仔,手項个牛拂仔會高高擎起又輕輕仔放下。毋過,佢毋係愛打牛仔,牛仔恁辛苦做田分恩食,仰會盼得打──姐公係愛同牛仔逐烏蠅合爪癢。
 
又聽著姐公畜个大黃狗頷頷吠,遠遠就歡迎涯兜,姐公聽著乜「voˇ~」長長一聲,喊牛仔頓恬放尞。正笠嫲脫下來、撥一下涼,又同涯兜擛手,大大聲喊講:「天時恁熱,頭那無戴帽仔會曬布忒,先轉去尞涼!」毋過,就無愁自家日曬夜曬會曬壞無。老古句講,「爺娘惜子長江水」,就驚怕「子想爺娘無該擔竿長」。
31 2 3 下一頁 跳到