• 今日66折
  • 天天BUY
幸福果

幸福果

  • 作者:張捷明
  • 出版日期:2019/06/30
內容連載 頁數 1/3
客語文〈幸福果刺波仔〉

刺波仔又分人喊做野草莓,係細人仔个幸福果,想著就先做一首童謠來唱:

〈幸福果〉

刺波仔
紅叮噹
阿哥摘
老妹想
毋驚一身竻
輕輕手心放

細心呵
共下嚐
甜唧唧
毋會酸
輕輕唱歌仔
食等幸福果

在大自然環境大个細人仔,盡幸福个係,在路脣搞个時節看著一柯啾紅个刺波仔。
 
刺波仔像手指公恁大,頂高係一細粒一細粒礫礫矻矻个細漿果,排到拶拶黏共下所形成个中空漿果,色目盡靚又盡清甜,係細人仔盡讚斗个零嗒之一。
 
毋過,刺波仔好食又一身竻,愛食無恁該摘,一下無細義就會分竻刺著,一群細人仔共下搞,係有細倈仔、細妹仔共下就較爭,細倈仔毋驚痛,會摘分細妹仔食。紅刺波仔空心軟弱糖水多,係盡嬌思个細水果,一定愛輕輕仔摘、輕輕仔拿、輕輕仔放到阿妹手心項。
 
刺波仔好食,毋過愛食進前愛先經過一個小儀式──將刺波仔放到巴掌心托等用氣「呵」過再放入嘴肚,「呵」也有小心呵護个意思。因爭刺波仔雖然嬌思,毋過刺波仔藤成長環境又坎坎坷坷,生到路脣、崁下、石頭崗,該全係人个腳跡難行到个所在。因爭佢一身竻,係耕種人盡惱个野草之一,望毋得除絕,絕對毋會在有整理過个圃園肚出現。故所在人个想像中,人腳跡難行到个所在就難免有蛇哥,刺波仔藤矮矮仔貼地递藤,就想像蛇哥乜在地泥下緊趖緊伸長舌嫲敨氣,故所食刺波仔前愛先用氣呵過,講係先解蛇哥个毒氣。
 
這係毋係有正確个科學根據涯毋知,其實刺波仔係盡淨俐个水果之一,嗄完全無大人惜、無人治理。總講食前愛呵過,係較大个阿哥阿姐,一代一代教老弟老妹傳下來个。恩俚做得緊呵緊想像阿哥阿姐、阿爸阿姆、阿公阿婆,甚且一百年、兩百年,大家就食共樣个刺波仔、共樣細心細意「呵」刺波仔,乜係一種生趣又幸福个事情。刺波仔本身雖然係盡淨俐水果、無噴農藥,毋過恁多年來嗄因爭農地使用各種除草劑,或者空氣汙染、廢水汙染,嗄差毋多會打絕種矣,緊來緊難看著。這斯順了大人个意,嗄分細人仔个童心少了一點幸福想像。

頭擺涯恅著「呵」刺波仔係吾故鄉正恁樣,結果上來北部食頭路,加上網路發達,正發現南南北北个所有人都有這共同个食法,正經當生趣。
31 2 3 下一頁 跳到