美男子竇蓮魁－標準化台語漢字版
       
頭齣
 
〔演出閣有五分鐘就欲開始，樂師佇咧調音，場務人員請觀眾入場。演竇蓮魁的演員坐踮演員休息室內底，咧欲梳妝好矣。演員拍開慣勢使用的手機仔社群軟體，進行視訊直播。精心化妝過的面容，投影踮舞台兩爿的螢幕。親像平常時演出進前的儀式仝款，戲迷留的訊息佮愛心符號直直來，演員佮觀眾互動、對答。開場時間到矣，演員行向舞台，直播禁掉。〕
       
〔觀眾席電火漸漸暗來。場務人員舉牌提醒觀眾愛共手機仔關起來，音樂起，字幕捲動。〕
       
第一場
       
［大幕開。1935年，太陽寫真場。〕
       
［太陽寫真場是一間時行的店。壁佮櫥窗頂懸掛真濟「啟蒙顧客美感」的人像相片，每一个人物看起來攏活跳跳。店鋪內以暗房、攝影棚、小客廳區分空間。攝影棚內，烏柴屏頭前，妙峰坐佇單人椅頂懸，頭戴大頂的查某帽仔，半遮面。手提羽毛合扇，腰縖紗裙，裙跤現出尖頭懸踏皮靴。伊拄好咧翕當時流行的「男扮女裝」的寫真，因為妝了誠好，看起來佮女性無無仝。香檀坐踮小客廳的絨布長椅條，興味真足來看向攝影棚彼爿。雲清替妙峰調整姿勢的角度、翕相。〕
       
雲清：你的面倚正手爿一點仔，下頦攑起來。好，先莫振動。
       
［幾秒鐘後，翕相完成。〕
       
雲清：好矣。
       
妙峰：雲清！你這馬共香檀小姐單獨翕一張仔好無？
       
［妙峰對椅仔頂徛落來，共帽仔佮紗裙褪掉，是一位相貌堂堂的烏狗兄。〕
       
［香檀抹大紅色胭脂，坐咧原先妙峰坐的椅仔頂，換妙峰共看。妙峰憐愛將伊的頭鬃掰去耳後。妙峰坐咧香檀原先坐的絨布長椅條。〕
       
［雲清瞭一下仔相機觀景窗，指喙角，意思是香檀的胭脂抹著喙角。香檀拄欲用家己的手巾仔拭，雲清共伊擋咧。〕
       
雲清：你莫振動！
       
［雲清用家己的手巾仔詳細拭香檀的喙角，就共手巾仔烏白擲佇塗跤，然後換新的底片。〕
       
雲清：等一下……好，香檀小姐，吸一口氣，莫振動。
       
［高騰入場。〕
       
妙峰：高騰！
       
高騰：妙峰。
       
妙峰：你來矣？你也來翕相？
       
高騰：雲清衣錦榮歸，佇太平町開業，我自然愛來捧場。
       
妙峰：高騰，你嘛來換衫一下。你扮先生，我就扮先生娘！
       
［雲清替香檀翕寫真翕好，提出底片。〕
       
高騰：〔對妙峰〕哈哈哈，真可惜我已經有某有囝矣。
       
雲清：高騰伊家己就是先生！你是欲伊扮啥物仙？