★買賣
 
賣田賣地
一區種無三代的家火
賣肉賣血
雙手抽無澎湃的油花
賣字賣畫
一本換無三兩版稅
賣年賣月
千萬換無青春翻頭使目尾
 
鬼欲買
買來變造四界
新樂園掛牌，講是浮華戰勝了一切
骨氣是艱苦人的痟話
魔神仔上曉躉貨
買來轉踅
歡迎三魂七魄交換半張面皮
另外半爿慢慢等天堂落價
 
《中國時報•人間副刊》，二○一四年三月十七日。
 
★未曉
 
未曉好嘴
甜是糖仔的權利
五顏六色
嘴舌開出花蕊
毋免春天
毋免添水
溫柔是伊攪出來的深池
予人泅水
予人淹思
予人若浮屍
料準內底無摻半句歹意
愛著，計較啥物
敢著未曉半字
才好欣賞一座花園的四季
放掉自己
不再堅持
選花揀籽
安排內心的色緻
其實寒霜一片
稀微
恬靜，無所為
冷眼無所不至
看伊牆外的風轉彎踅角，來來去去
也毋願證實阮的懷疑
 
《台文戰線•第三十四號》，頁一○一－二。
高雄市：台文戰線雜誌社，二○一四年四月。
 
★天堂
 
若有天堂
在何方
阮欲對準彼個方向
毋免走撞
氣力集中
用爬的
趕走倉狂
也會甘願歇喘
趴佇土腳
聽蚼蟻
安怎講
講雨，是如何梟雄
講風，上愛無端中傷
講雷電啊
驚走軟弱的虛妄
無心的
也毋免假裝
趁早裂破堅強
 
《台文戰線•第三十四號》，頁一○二。
高雄市：台文戰線雜誌社，二○一四年四月。
 
★潤餅
 
鹹酸甜
捲做堆
清氣合味
哺春天
害阮無嘴來應舌
 
逐項攏捲
毋是縛行李
毋是欲走去海邊揣鯊魚
 
只捲一項
敢會拍損阿母的準備
敢會錯過種佇田園內底的秘密
捲著相思
望歇睏
根本無心來寫字
阮的舌強欲跳向遙遠的桌邊
啊，鹹酸甜
 
《海翁台語文學•第一四八期》，頁一一九。
臺南市：開朗雜誌社，二○一四年四月。