四蕊思念
離開兩冬外
雄雄走過來攬牢牢
四蕊紅紅對相的
思念

共想你的線索剪掉
共想你的線索一條一條剪掉
電子批一張一張擲入糞埽桶
你送的物件攏送出國
鞋仔穿佇荷蘭姑娘的跤
洋裝飛去非洲展覽
共想你的心一擺一擺退燒
無愛閣去鼻
一夜一夜等你的暗暝

心境
一塊烏布
四界共人畫烏漆白
家己染做白布
一塊白布
四界共人鬥跤手
予人染做烏布

心境自在
管汰伊烏布抑白布

時間敢欲賣
溪水慢慢仔流
水中的苦楝花寬寬仔走
暝日思念紫色的花草

南風沓沓仔吹
埕斗的玉蘭芳勻勻仔飛
愛伊的純情為伊癡迷

金風雄雄來掃
山頂的楓仔葉直直落
袂赴惜就予雨漚漚

冷風陣陣咧透
嶺頂的梅花颺颺吼
捧袂著就予風颱走

天公伯仔
時間敢欲賣
停一下仔愛偌濟

年兜
年兜的跤步愈來愈近
日頭的喙鬚愈來愈長
故鄉的田塗愈來愈芳
逐家轉來鼻田塗味

外口鬧熱滾滾
內面冷吱吱
慣勢泡兩杯咖啡
年兜暝那啉那等你
干焦聽著老時鐘滴答滴
小小的溫度燃著過去

拍開柔柔的旋律
一人一杯一杯閣一杯
月娘也醉也綿綿
多情守到天光

智慧佮感情畫平行線
春天一走二十晃

你若重出世
你若無啉孟婆水
阮欲揣你講過去

相思茶
啉一喙
對你一見鍾情
想欲化做目尾魚
泅入你的心房

啉一杯
對你刻骨銘心
想欲化做蜜蜂
偷偷仔採你的花芳

啉一鈷
對你日思夜夢
想欲化做茶水
一直唚你的喙脣

攏是你
害阮耳仔燒甲會燙--人

烏頭毛變白頭鬃
青春對指頭仔邊漏去
烏頭毛一時仔變做白頭鬃
日光對樹葉仔縫掖落來
一線的燒烙承無著
只有淒涼的烏寒徛佇門窗

無邊無際的暗暝
當時才會有貓霧仔光