序
無名小草看盡台灣滄桑--<台灣阿草--台灣史蹟草木台語詩集>
李勤岸
王永成這本詩集是申請國藝會ê寫作補助完成ê。我真幸運足早就讀著伊完成ê規本詩集。非常欣賞伊ê寫作計劃以及執行寫作計劃ê能力。
王永成ê筆名我到今記bē分明，到底是王羅蜜多，抑是蜜多王羅？為啥物我逐kái lóng kā伊記做波羅蜜多王？可能是伊hōo我ê印象就是一粒蜜足濟ê果子王。有汁、真甜，親像伊寫ê詩，伊畫ê圖，伊ê小說、散文。真濟樣類，真多產，koh若像日頭神阿波羅，豔麗、光彩。你beh無看著伊ê形影，無感受著伊ê熱情，mā無可能。
知影伊是新化人，阮故鄉ê人，是無偌久進前ê代誌。原本掠準伊是少年家，會使算是阮大目降第四代ê作家。彼擺，tī台北一个228歷史文學展覽ê場所見面，才發現伊m̄是第四代，是kap我仝沿ê第三代。新化進前tī楊逵文學館辦活動，紹介uì清國時代ê古詩人王則修到第四代小說家許正平ê作品文物展。彼實在有較失禮，竟然落勾咱這位波羅蜜多王---王羅蜜多！
這敢若像伊這本詩集ê主角：台灣阿草。無名小草，卻是歷史ê主角，咱煞無kā伊看在眼內，當做伊無存在。窮實，是咱目色無好，小草，無名小草，正正是看盡台灣滄桑ê歷史見證者。講做無名小草mā是咱人ê無知，致使遮爾濟有來歷有身份ê老樹老草，咱lóng當做in 是倯kah bē講得ê「阿草」爾爾。
啥人寫赤崁樓會kā焦點囥tī羊齒蕨？寫安平古堡囥tī雞屎藤、寫孔子廟囥tī愛睏樹？只有王羅蜜多！伊才了解小草，小草才是歷史ê主角。伊tī詩中hōo小草kap古蹟去對話，講出咱台灣創傷ê滄桑。
王羅蜜多這本詩集，uì台灣北寫到台灣南、寫到台灣東，uì本島寫到離島。用兩冬ê時間，行遍台灣全國。M̄是干焦行跤到，伊koh翕相轉來。揣著每一个古蹟ê主角草，參伊對話，聽伊參歷史對話。按呢一跡一跡行踏，一首一首寫出詩。這ài用偌濟精神體力？偌濟時間金錢？偌濟耐心疼心？若m̄是對台灣這塊土地無限ê疼，對台語文學無邊ê熱，對台灣歷史無盡ê痛，無這三个多情ê心：疼心、熱心kap痛心，啥人有才調寫出這本詩集？
王羅蜜多北台灣ê起點是紀州庵文學森林，中台灣ê起點是台中文學館，南台灣ê起點是台灣文學館。是按怎伊ê起點lóng是文學館？伊心目中文學才是台灣歷史ê起點。伊可能是先知，所以目前拄teh發生中ê台北文學館，tī紀州庵進行籌備中，伊已經kā彼欉火炭母寫入去，當做台北文學館ê開基草ah！台中文學館ê土檨仔，你敢有想beh去挽來食看覓？台灣文學館ê鳳凰樹，你敢有想beh看伊火紅展翼ê姿態？我建議此後，咱逐冬lóng來辦一个台灣文學旅行，逐家手提王羅蜜多ê這本《台灣阿草---台灣史蹟草木台語詩集》做導覽，踏查一跡一跡ê古蹟，揣出每个古蹟ê主角：彼ê無名草木，一首一首tī伊面頭前朗誦，參伊對話，聽伊回應。用按呢來注神聽台灣上蓋深沈ê歷史聲音，咱台灣阿草ê心聲。
--2022.6.26台北和室
台灣植物佮史蹟的對話
王羅蜜多
【古早樹】
古早樹，通常是指一百歲以上，抑是胸圍達到標準，或是特殊的老樹種。伊是綠色的活古蹟，也是歷史的見證。公部門會共列入保護，注意伊的病痛，土壤，排水，以及人為的破壞等等。目前全國列入老樹登錄上濟的是台南市，有八九百欉。
古早樹，有本土的原生樹，比如府城定看著的台灣欒樹、牛樟、欖仁、苦楝、莿桐、榕樹、樟樹、茄苳等等。另外有誠濟是自古早，荷蘭，清國，日本時期引進的樹木，種佇重要的街路佮建築週邊，受著保護，閣兼生湠，終其尾，變成台灣普遍的樹種。
親像府城的台南公園(1917年開園)有誠濟的老金龜樹(1645年荷蘭人引進台灣)，雨豆樹(1903年引進台灣)。閣有路邊定看著的鳳凰樹(1897引進)，佇機關學校頭前的大王椰子樹(1898年引進)，攏是日本時代的重要植物。
其他，一寡果子樹，土檨仔，蓮霧，楊桃等等，雖是外來，已經馴化本土。佇咱生活環境中的老樹，上濟看著的是榕仔，百年以上的四界有，尤其廟埕。
【古早花草】
台灣的植物規萬種，捌袂了，尤其野生花草四界生湠，若無特別去注意，往往毋知是啥物草。有時陣整理環境，做一下剷（thuánn）掉，抔（put）掉，攏無留下身屍佮名字。
窮實，大部份的野草攏是古早草。伊的壽命雖然短，復活卻是誠緊。伊佮古早樹的命運無仝，會使講有老樹無老草，毋過伊四常佇花園，埕斗，壁角，點仔膠縫，只愛有一點仔塗粉，伊就有可能暴穎，復活起來。
我算是疼惜古早草的人。比如佇厝頭前的小小花園，就有鹽酸草，赤查某，雞屎藤，烏點鬼，大飛揚，無頭土香，成功白花草等等…非常濟種的野草，充滿活力。每一種草攏有伊的性命，我從來袂共叫做雜草，也袂全部除掉，經常保留一部份，觀察伊開花結子，生佮死的過程。遮的野草也若像講通和，逐年有輪耕的現象。
野草，自咱先祖的時陣，用來做治病的藥草，伊千百年來，參咱的生活牽挽做伙，所以攏有足濟本土化的俗名，有的俗名甚至濟甲二三十種。
毋通輕視任何一種野草，其實有時陣予人誠討厭的野草，伊的花蕊會媠甲予汝驚奇。比如本土的雞屎藤，比如外來的小花蔓澤蘭。
【古蹟、古早樹、古早草的對話】
承蒙國家文藝基金會創助補助，我佇舊年中完成《台灣阿草—台灣史蹟草木台語詩集》七十二首，分編做北台灣、中台灣、南台灣、東台灣、台灣外島等五輯。其中台南府城佔上濟首。內底的詩篇，多數佇五十逝至一百逝中間，閣加上植物、古蹟、歷史場景的相片、註解，規本冊的篇幅會使講嶄然仔大，佇出冊的進前難免考慮再三，是毋是減少相片張數?刪減註解？毋過，以這本詩集來講，誠濟特殊的植物佮歷史場景，如果無透過適度的說明佮相片的顯示，恐驚讀者無法度了解對話內容的特殊意義，而是干焦對詩句的角度來欣賞，未免無彩我用兩冬的時間，上山落海四界走傱觀查，閣佇現場翕一萬外張相片。
佇兩冬的旅行寫作中間，我每次欲出門愛先做功課。因為主題是植物佮史蹟的對話，所以選材愛誠用心。一方面，佗一跡有原生的、特有的、珍貴的、足古早的植物花草，攏是探查的目標。另方面，佗一个古蹟佮歷史場景有特殊的植物值得去寫，就深入去了解。不過，上重要的是，遐的史蹟佮現場存在的特有植物有對話的趣味、意義佮想像空間，才會落定題目，寫做一首詩。如果發現無對話的意義，準講走足遠兼住暝去看的景點，也只好放棄。另外，因為植物的名字，往往不止仔濟，佇這本詩集內底所採用的，多數是佇台語俗名內底，選擇較適合融入詩作的名字。
今年五月中間，因為某種對話的熱火閣著起來，本底已經訂好機票、船票、旅館，並且選好地點佮植物，欲去綠島佮蘭嶼行踏，預算會當閣產生一寡作品。無疑悟病毒雄雄大流行，煞全部取消，而且行程欲延到底時，無法度按算。毋過總是祈求上天保庇，向望這个美麗的島嶼平安無事，緊緊復原。植物佮史蹟的對話總是會繼續閣寫落去，毋管用詩抑是散文，甚至是小說。
【咱的鄉土咱的詩】
誠濟作家寫植物抑是地誌詩，是看冊抑是網路資料寫的，毋捌去過現場，甚至毋捌看過彼種植物。當然，伊可能用想像力佮寫作的技巧，也會當寫出誠好的詩作。毋過，可能對植物場景的描寫會較淺薄，閣有當時，共地理環境佮植物名稱混亂去，造成對讀者的誤導。寫這本台語詩集，我的原則是，無親身踏查現場觀看史蹟佮植物，閣共影像翕轉來，絕對無寫這首詩。這種理念，予我兩冬的踏查，費誠大的氣力，誠辛苦，毋過亦誠有意義。
佇踏查的中間，有意外的驚奇，譬如紀州庵的火炭母拄好開花結子滿滿是，誠符合文學森林，文學傳湠的意味。譬如規个北港溪埔的牛蓖麻旺嗄嗄，拄好佇牛將軍廟的路裡。另外菁桐坑已經無菁桐，只有國小有復育幾欉仔。蘇有志故居的車輪菜佮古早磚攏廢去矣！豐田移民村拋荒去矣！金門海印寺的數百年鐵樹死去矣！不而過，東引地雷雞鵤刺規路邊，予我不止仔驚喜。閣有較譀也趣味的是，去揣恆春猴洞山的珍貴老樹鐵色，沿路問在地店家，竟然攏毋知影有彼欉寶貝。
或者植物史蹟書寫佮台語創作仝款，比較較冷門。不而過佇兩冬外來的行踏佮書寫經驗，予我深深體悟，堅定的古早遺蹟，活跳跳的綠色古蹟，攏參歷史牽挽做伙。佇台灣島內外行踏，若會曉來欣賞，用怹來探討歷史的演變， 用怹來思考人生的問題，性命的意義，相信生活會加誠豐富，加誠趣味。
我毋是歷史學家，也毋是植物學者，誠濟歷史佮植物的知識是行到佗學到佗。我佇舊香蘭燒燙燙的海沙埔踏破第二雙鞋，佇徛家附近的圖書館借冊，佇網路搜尋資料，四界聽演講，佇路裡若看著特殊的野草，就跔落來觀察研究。我用詩人的角度來看待怹，用母語，用台語詩共寫出來。遮的台語詩創作，摻濫我的性命歷程，豐沛我的精神內涵，也予我深深愛戀生活中的這片土地。
（2021/6/10寫佇府城柴頭港溪邊）
天天爆殺 
今日66折 
博客來
博客來
博客來
博客來
博客來
常見問題
線上客服
客服信箱
