夫妻感情好
 
我跟阮先生是媒人介紹結婚的。伊的家庭和阮父母有熟，媒人一來講親，阮厝就講好。阮先生在公學校高我一屆，在公學校時，我看過伊，但是未曾講過話。伊來阮厝找阮小弟，彼時伊穿台南二中的制服，看過去很帥。後來媒人來講親，人來講就好，阮父母也鼓勵我接受這門親事。訂婚以後，阮也未曾講過話，古早人都照古早禮，雖然是這樣，要嫁給伊之前，我也不會覺得驚驚的，伊的家庭也是很好的家庭，厝內有一間南部第一家的運送店，我想伊的家庭不錯，阮父母跟伊的父母也很熟識，所以我就跟伊結婚，阮是在日本神社結婚，彼時我戴白紗。
 
阮結婚以後就跟伊全家住作伙，我要照顧「大倌」（公公）、「大家」（婆婆）和三、四個小叔，一家很多人，要煮飯、做厝內的代誌，做得我要無頭去了；未結婚之前，我在厝未曾做過家事。一直到我生產以後，要一心照顧囝仔，才請佣人幫忙做家事。我有四個囝仔，老大和老二是查甫，老三和小的才是查某，我和阮先生會帶囝仔出去看電影，出去外面走走。
 
阮二人感情真好，伊真疼某子（妻和子），不會有外遇，彼個時代真多查甫人都在外面有查某。伊會買好吃的物件和水（漂亮）衫給我；有一次，伊看到台南有一間皮很好的鞋店，就專程帶我從屏東去台南做鞋。我二十七歲才結婚，在彼當時算是真慢才結婚，我是因為較慢才去讀高女，所以較慢嫁。二二八發生時，我還未滿四十歲，阮結婚才十幾冬。落後人家嫁，但是早先人家無尪啦！
 
二二八從台北傳染到屏東
 
二二八是從台北傳來的，像傳染病一樣。阮先生彼時是屏東市副議長，因為當時議長破病，所以阮先生就要出來照顧社會；像有的打架受傷的，阮先生就帶去給阮兄哥敷藥。伊都在外面無閒，我對當時外面的情形也不知道，我只知道伊有帶市長藏在屏東飛機場，市長是外省人。後來大軍（指國民黨軍隊）來屏東以後，議長去歡迎市長，從機場出來，過無幾天，阮先生走在路上，就被憲兵帶去憲兵隊。伊一被抓去後，馬上就有人來阮厝講，阮小叔就提飯去給伊吃，我彼時要照顧囝仔，無閒可去，彼時我的囝仔，老大才九歲，一個七歲，一個五歲，另外還有一個在肚腹內三個月。