拯救
郭頂順（Kueh Tíng-sūn）
原刊佇《芥菜子》第1、2號，1925.7、10
 
老母看著，真可憐就講：
 
「今好啦！有拍就好啦！」
 
欲去為的時，老爸受氣講：
 
「你恬恬，各人去做各人的工。」「這个查某囡仔無拍就毋聽喙。」
 
就對查某囝講：「後擺敢(kánn)閣去無？」
 
若是查某囝無應就閣拍，已經真忝，查某囝姑不將講：「毋敢啦！」老爸箠仔下咧，就做伊去市場辦伊的代誌。
 
這个老爸名叫陳正直，現時搬來佇一个小街市，咧予市場的會社倩，真𠢕趁錢也真𠢕開，所以一家無賰錢，定定散散。伊幾若年前是一个好額人，蹛佇大街市；總是因為伊的袂滿足，去買當時咧賣人的株券也失敗，所以今就逐日勞苦才有通食。
 
佮一个真通可取的婦人人，名蔡寶玉(Pó-gi̍k)，結婚10數年，孤單一个查某囡仔名叫水蓮；今年11歲。對這个囡仔的穿插逐日真鮮沢真次序，總是無媠，就通知毋是老母貧惰，是老爸的散赤。水蓮真媠，真得人疼閣真𠢕，學校讀煞若轉來，就幫贊伊的老母洗衫煮飯，所以予伊的爸母真疼伊。
 
今，按怎遮乖的囡仔會予伊的老爸拍到按呢？就是拍伊去做禮拜。
 
有一日對學校轉來佇同伴遐𨑨迌的時，無張持觸著石，血流真濟，拄拄彼時有一个主日學的先生(sian-sinn)，名叫陳有為，對遐過，看見血直直流，就緊拆伊的手巾包伊的跤，𤆬伊到家己的厝，用藥共伊糊；就佮伊的同伴𤆬伊到厝。水蓮共先生說謝欲入去的時，先生叫伊若好才去伊遐𨑨迌。查某囡仔將遮的代誌共老母講，老母聽了真呵咾先生，也想欲看伊，總是到戶橂已經無看見人。
 
禮拜日水蓮的跤好，去先生遐𨑨迌，先生順紲𤆬伊去禮拜堂看主日學。伊看主日學的學生逐个真活動，歡歡喜喜，伊也想愛入。出禮拜堂問先生看伊會得入未？先生隨時允伊；也講真濟耶穌來歷予伊聽，水蓮真快佮有為先生熟似，因為先生定定笑誼誼，真心適、真親切。
 
對彼霎(tia̍p)了後，查某囡仔逐禮拜攏有去赴主日學，若有閒就來先生遐學字母。真巧閣真勉強，所以毋上三月日就字母攏看了。有一日水蓮到真暗猶咧複習字母的時，老爸食酒轉來，問伊看咧看啥物(sím-mi̍h)。水蓮笑誼誼，攏袂記得老爸有禁伊讀耶穌的冊，就講：
 
「呢，阿爸這你捌無？」
 
「彼敢(kiám)毋是紅毛字？你當時也遐𠢕會讀彼款字！」