一欉小花蕊(台英雙語童詩集)

1. 討債 Saving
2. 蝴蝶結 Butterfly Bow
3. 小雨點 Little Raindrops
4. 培墓 Tomb Sweeping Day
5. 果子佮其他 Fruits and Others
6. 一枝粉筆 A Piece of Chalk
7. 一欉小花蕊 A Little Flower
8. 樹公仔 Grandpa Tree
9. 愛的歌聲 Song of Love
10. 鬱卒的天星 Unhappy Stars
11. 今仔日 Today 
12. 鳥暗的雲 Grey Clouds 
13. 寂寞 Lonely 
14. 狗蟻食我的餅 Ants Eat My Biscuits
15. 月娘 Moon
16. 風颱 Typhoon
17. 驚惶 Scare
18. 佮阿母買物 Shopping with Mother
19. 雷公 Grandpa Thunder
20. 溪水 Brook
21. 惡夢 Nightmare 
22. 吵鬧的世間 The Noisy World 
23. 天佮地 The Sky and the Earth
24. 白蛇傳 The Tale of the White Snake 
25. 空氣 Air
26. 冤家 Quarrel
27. 禮物 Gift
28. 阮咧彈琴 Playing Our Music

作者序

一欉小花蕊－－「台英雙語童詩集」出版的頭序　李秀　

　　平常時愛寫小說佮散文，童詩毋捌想過欲寫。佇一個溫和的黃昏，音樂家黃友棣教授，看著我綴兩個小乖乖，佇文化中心的草埕歡喜走相逐，而且嘴裡哼唱一寡外國的童謠，伊沉重按呢講：「你們這些文字工作者，該為下一代寫些童詩，不要老叫他們毫無選擇的接受外來東西。寫出來！我樂意為他們譜曲。」長者諄諄，聽者謹記在心。自按呢，我完全投入毋單是詩、嘛是童心的境界。

　　「童心是人類內心遙遠的故鄉。」真密貼點出我創作童詩的心路過程。文學創作會當抒發理念佮情懷，尤其寫作兒童文學，愈會當將一個人的童心牽勾出來，親像共失落足久的寶物揣轉來身軀邊仝款。因此，一片一片的雲彩、一蕊一蕊的花草、一點一點的雨滴…化作囡仔時幼柔的目睭所看著的世界。尤其我厝裡彼兩個學琴的後生、查某囝，予我真濟創作的靈感。

　　兒童是人生發展中一個重要的階段。怹的幻想、好奇、同情、想像……差不多生活佇家己的天地內面。事實上，兒童本身就是一部真好的文學。譬如，國小低年級的同學，若看會著的、摸會著的，攏真好玄、有趣味，這是一種純真的直接反應，伊袂考慮其他方面的影響。親像風颱來矣，伊袂想著風颱帶來的災害，因為伊毋免上課、爸母毋免上班，閣再講風颱的勢面佮新奇，會當引起伊足大的刺激感。

　　世界在怹看來，人參萬物攏是一家。伊看幼星袂振動，嘛會使講是一群無聽話的囡仔，予月娘老師罰徛佇天頂面；雷公大概予雷兄弟惹受氣才會發赫大的脾氣；小雨點愛四界跳舞蹉跎，有的佇厝頂耍飛刀、有的跳落河內游泳、有的淋佇土跤佮花蕊姐仔開講……這款參天地萬物合一的情懷，真正是人生上美妙的時段。

　　高年級的同學，身心有足大的發展，求知慾增加，理智咧發育，獨立的個性慢慢形成。求知欲、正義感、愛冒險，時常佇生活中展現出來。像「今仔日」、「空氣」、「阮咧彈琴」……等等，就是怹的縮影。觀察童心變化，是寫作童詩上大的快樂！這本童詩集起初是用華語創作，其中十二首，黃友棣教授已經譜成曲，予「兒童唱歌得著快樂」是伊上大的向望。

　　華語版有得著高雄市文藝獎，頒獎時嘛捌佇高雄文化中心予小朋友表演過。評審所講的「這些著作跳出前輩童詩作家的表現手法，具有獨特的創意。」現在經過十幾冬的歲月，我將它翻譯成英文。

　　續落來，閣予胡長松的「踏入臺文，世界會愈曠闊」觀念影響。起先我有翻英文比翻臺文閣較簡單的感覺，真歹勢！我是正港的臺灣人矣，呔會使有這款想法。宋澤萊嘛按呢講「佇異鄉寫家已的母語，會當消除思鄉的痛苦」。佇溫哥華每一個寒冷的暗暝，我猶閣投入臺文的兒童世界，發現用臺文書寫真正是貼肉黏骨。用母語寫童詩，是這世人創作過程中上界美好的感動，伊深深挖掘家己生命中存囥的詩意，親像遊子佇他鄉遇著久年失散的親人。

　　然後我以「台英雙語童詩」系列刊登於北美一個文學組織”Writers Digest Community”，受著英語世界讀者參作家熱烈的反應。有一個寫小說的美國作家Timothy，伊講讀我的童詩，予伊想著19世紀一個真出名的詩人William Blake的詩；閣有另外一個詩人，捌佇咱台灣台北美國學校教過冊，伊講遮的台英童詩是一本會當予臺灣囡仔想欲學英文的好教材……這款的呵咾，對我來講真正是一種額外的鼓勵。

　　另外我特別愛感謝澤萊兄，因為伊蹛的所在袂當買著適合的字典, 所以叫長松兄佇高雄寄字典來溫哥華予我，我講郵費傷貴矣，等我轉去臺灣才講，長松講「佮作家的作品相比，郵費無要緊啦！」即馬我已經漸漸看著五彩的春光矣，毋單臺文的代誌，閣有友情的感動。

　　這本台英童詩集有28首，向望會當予小朋友、大朋友帶來一寡驚奇，一寡共嗚，知影宇宙萬物之間，攏有值得逐家來啖糝的趣味。