序
踏話頭 毋是咱較𠢕
文化留 國際好𤆬頭
製作人 / 劉惠蓉
「車內新娘媠噹噹，胭脂水粉抹紅紅。歡頭喜面等嫁翁，講欲幸福一世人。」這種對自然肉聲吟唱，或者是用唸的「謠」，有豐沛聲韻美感，趣味透內涵的語詞，就是語言學習上好的步數。若閣共遮一句一句的唸謠，加上簡單的節奏佮旋律，成做一首一首的歌謠，絕對會吸引囡仔耳仔搤利利注心來聽。
所擺，惠蓉上愛利用家己編寫的唸謠、歌謠，配合一寡古錐孽譎仔話，比手畫刀搖尻川花，莫傷過複雜的動作，𤆬領囡仔那唸唱那搖擺，看著一个仔一个的囡仔兄囡仔姊，耍甲足歡喜可愛的模樣，心肝內的忝頭攏融去矣，予咱安慰的是下課時間，遮一陣、遐一群的囡仔汰囡仔，囥佇喙邊餾的聲音，是老師上課教的臺灣話，表示𪜶誠緊就學起來，嘛已經收藏踮頭殼內底，為文化內涵釘根囉！
因此，這回共原本欲交學費的金錢，提出來做出版的本錢，共前幾年做節目、出冊的經驗，整理編寫過的囡仔詩詞，揣音樂才子莊名豪老師合作，阮下重本以傳統音樂編做歌謠曲調，希望予咱雅媠的本土文化「臺灣母語」開花結子生湠落去。
話到遮，喉管滇。想著人生頭擺做「製作人」這種狗蟻歕洞蕭的志業，會當轉變成做有意義的「事業」，除了愛感恩濟濟共惠蓉牽教指導的前輩以之外，特別欲閣感謝新市前後兩位大家長的張瓊文校長佮李智賢校長，猶有若小妹的臺灣阿信、新港社罔市仔的兩位主任，若無學校支持，阮就無才調佮明麟老師「閩客一家親」廟埕前、歷史博物館舞臺頂，以及電臺佮電視內底，用咱爸母話向逐家請安問好「大家好，承蒙你恁仔細」予多元天籟的本土語言融合做內容，替臺灣子弟打造屬於獨一無二的舞臺，更加向望日後國際舞臺咱的文化來𤆬頭。
天天爆殺 
今日66折 
博客來
博客來
博客來
博客來
博客來
常見問題
線上客服
客服信箱
