1984台文版

　　20世紀英國作家George Orwell ê名著《1984》是袂退時ê政治預言經典。出版超過75冬，設定ê年期mā超過40冬矣，世間咧談論政治猶是定定會引用著。只要世界猶有欲絕對掌權、共眾人uì行為到思想攏控制牢牢ê勢力，Orwell描寫ê恐怖kah荒譀就離世人攏無遠。

　　台灣人有家己ê語言，毋是kan-na值得用中文。台語愛正常化。佇現時在地ê語言環境，《1984》出台文版，無可能是為著一般譯冊ê目的——共外國冊用咱國人熟捌ê語文介紹予人看有。Tsit个翻譯工程有發展語言ê目的，所以規本ê用詞排句攏有對重相關ê價值。台語行到在來生份ê領域，讀者mā是咧參與開創。
 

作者簡介

George Orwell

　　英國作家、記者，1903年出世，1950年因為肺癆過身。伊中學出業了後去Burma做殖民地警察，五年後辭頭路，轉英國追求寫作ê志望。1936年去參加西班牙內戰拍法西斯，煞體驗著蘇聯式政治鬥爭ê烏暗粗殘，註定伊紲落來拚勢批判一切極權主義。《1984》佇1949年出版，就是最後、總結ê代表作。

譯者簡介

周盈成

　　中年男，貿易商，前記者。日常寫台文十捅年。面冊專頁：世界台 Sè-kài Tâi。

I-1
 
4月一个寒凊好天ê日子，時鐘霆13點，Winston Smith共下頦勼倚胸坎，閃覕歹毒¬ê風，伊軁過勝利大樓ê玻璃門，跤手緊猛，猶是去予一卷塗沙粉綴伊走入來。
 
巷路ê氣味敢若煮過ê高麗菜濫舊布苴仔。一頭ê壁頂有釘一張彩色海報，展佇室內有較大。頂頭kan-na一个大大大ê人面，較闊一公尺。He是一个45歲左右ê查埔人，頂脣鬚厚koh烏，鼻目喙有寡性格ê緣投。Winston向樓梯行，電梯試都免試，上順序ê時mā罕得會振動，tsit站ê日時，電規氣切掉矣，因為當咧備辦「仇恨週」，著減省。Winston蹛ê厝間愛peh七節樓梯起去。伊今年39歲，正跤目較頂懸有靜脈爛瘡。伊慢慢仔行，規路歇幾若改。佇每一層平台，電梯ê正對面，大个面ê海報就uì壁頂金金看落來。Tsia-ê相有專工設計，目光會綴你徙位。相ê下跤一逝字講：大兄哥咧共你看。
 
佇厝間內，有一个飽水ê人聲咧唸規捾關係生鐵生產ê數字。聲音來自一塊長篙形ê金屬枋，若像暗霧ê鏡，鬥佇正手爿ê壁頂。Winston捘一粒開關，音量小降--lueh，猶是逐字聽有。Tsit个裝置號做「千里幕」（telescreen），聲會當捘細，毋過禁袂掉。Winston行去窗仔邊，玻璃照出伊細漢、荏身款ê體格，伊穿連褲ê藍色作穡衫，tse是黨ê制服，予伊看著koh較薄板。伊頭毛金sih-sih，面血色自然。皮膚粗粗，是bái質ê sap-bûn、無利ê喙鬚刀和拄才收尾ê寒人剾--ê。