咱來讀讀 (電子書)

自序 家己講對你講

01 恩典 02 同窗
03 阿母逐日 04 阿媽種菜
05 阿公再見 06 關門開門
07 未食五日節粽 08 西瓜皮
09 學泅學飛 10 白賊話
11 談戀愛 12 自由自在
13 原諒 14 四秀仔錢
15 新春快樂 16 行路
17 便所的味 18 做生日
19 賴你 20 舊衫
21 真珠奶茶 22 俗麭
23 思想家 24 十冬
25 字紙 26 翕鏡
27 孤單快活 28 日誌
29 記持 30 十箍
31 期待 32 飯丸
33 食冰 34 做月內
35 四百萬用了 36 米粉湯
37 衫仔弓 38 高級屎礐仔
39 撓耳空 40 正港的原住民
41 班長 42 便當
43 電話 44 民族救星
45 杯仔 46 喙瀾
47 家庭訪問 48 賣藥仔
49 咖啡 50 情人節
51 半老老 52 寫日記
53 鉸指甲 54 訂車票
55 下港人的特產 56 化妝品
57 氣象報導 58 講古講未來
59 山明水秀無憂愁 60 烏石膽
61 阿義踅夜市 62 空中小姐
63 玉蘭花 64 日頭
65 搖囡仔歌 66 板橋查某純情曲
67 蕹菜 68 阿母的禮物
69 足𠢕毋通吼 70 愛綴路的
71 蝴蝶公主 72 冊芳
73 看著幼囡仔 74 一工趁一萬
75 我是高雄人 76 比黃金較貴
77 啥物攏無做 78 第一句話
79 哪會猶未睏 80 咱來讀讀拚黃金

 

自序

家己講對你講

　　先來講冊名《咱來讀讀》，「咱」較親切，「來」是招你做伙，「讀讀」是用文白音的趣味講文章的來源佮期待。這本冊有我五冬56 篇教育部電子報「愈讀(tha̍k) 愈捌臺語( 閱讀越懂閩客語)」的專欄文章，有十二冬16篇全國語文競賽「閩南語朗讀(tho̍k)」的文章，閣有幾若篇我50 歲以後讀世間、看人生的短文。

　　毋管你幾歲，攏通輕鬆自在來讀這本冊。雖然文章有新有舊，毋過綴年歲我有成長，當初無夠幼路的想法佮語句攏閣共斟酌過，逐篇嘛共修予平均八百字長短，攏一千字以內的「千字文」，因為欲體貼資訊時代的閱讀耐性，欲予逐款年歲的人攏無壓力來看故事，親近媠閣趣味的臺語，嘛想講短文用來臺語自學、教學拄拄仔好。毋管你是讀文本抑是掃描QRcode 聽我的音檔，逐篇短短仔五分鐘內就完成。篇目多元閣獨立，想欲對佗一篇開始，看目錄在你選、在你揀，抑是隨緣掀開共點落攏是新奇，有無仝的趣味。欲聽、欲停攏在你。所以一寡較長、我不止仔佮意的新文章就無法度收入來遮。會當儉咧做另外的期待。

　　遮的文章，自2008年開始到2022，十二冬矣，有成「一粒紅紅飼甲大人」的國中生。敢是天意？註定欲陪𪜶111學年度上臺語課。不時有朋友共我講，我的文章用來準備臺語認證，提來教學補充，訓練寫作上蓋讚。有文學性閣趣味，用字簡單毋過藏足濟感情，看一篇無夠氣，會想欲閣看，毋過欲揣誠了工，閣驚落勾，拜託我緊出冊。多謝恁的支持佮意念，這馬真正出冊矣！咱做伙來愛臺語。這本冊佮《我咧唱歌》仝款，有字有音，有插圖有解說，毋過加三項寶貝，有圖典、素養互動提問佮克漏字，欲陪逐家自學佮教學。若是天意，嘛愛恁有佮意。

　　我驚收舊文章，對人客較失禮，毋過囥酒會芳呢！有人講毋管我寫家己抑是別人的故事，攏若像是逐家的故事，各種年歲攏看有。我佮意食一歲學一歲，十外冬定著濟少有成長，所以我共語詞、語法、語句修予閣較順，逐篇都si-á-geh 過。若有一半位仔用當初的時間、空間，是留欲見證寫作的彼段日子。若無細膩有一兩段仔佇《我咧唱歌》影過，彼就是我寫作的小宇宙！

　　有讀者誠幼路，發現我電子報的故事逐篇都有藏查某人的心聲，有時陣會看著少女的古錐，有時陣看著查某人的悲喜，有時陣中年簡單自然平常自在。真情真意的感情，沓沓仔講出來，看了得著安慰、較有勇氣行向未來。有影，當初佮邱文錫老師、陳憲國老師、藍春瑞主任做伙寫電子報，我是唯一的女性。而且我毋是寫小說，我是寫散文，我的故事佮我對臺語的感情仝款，攏是真的！我規頭殼較想嘛是臺語純文學，欲為臺語留音字，欲寫逐家看有的故事，予逐家輕輕鬆鬆來親近媠閣趣味的臺語文。予讀者一種邀請、接納、陪伴佮安心，看咧看咧就共臺語學起來！

　　欲按怎通自學、教學咧？綴音檔指字聽故事就好，莫去想艱難。看冊的時會當共較袂曉的字用鉛筆先框起來，到上尾篇就可能免框矣。嘛會當分段看抑是聽，停一下，想一下，自學查辭典，抑是用佇教學會當師生對話。逐篇有十个語詞註解，會當轉去文章揣寶、語詞延伸、綴咧造句，閣會當掠兩个、三个抑是五个詞來練認證的語句書寫，嘛會當查《教育部常用詞辭典》做語詞擴充。逐篇配合十二年國民教育素養教學，有攢幾條開放式、大人囡仔攏適合的問題，予親師生有對話，增加文章的理解佮批判思考生活議題。老師嘛會當走揣家己的記持，莫歹勢，換講家己的故事予學生聽，抑是予學生用臺語講類似的生活經驗佮想法。這本冊有一个特別的設計，雖然主編足驚散文集變做教科冊，毋過我感覺這是一種分享佮創意，閣較是為傳承臺語。請恁文章讀熟了後，一定愛練臺語漢字。我設計配合一學期20禮拜20篇，一學年40篇的克漏字填空的學習單，一篇100格以內，提供讀者綴冊的連結下載。你愛家己共印出來，配合文章的音檔，看家己的程度調整音速，抑是由老師控制當時欲暫停，當時欲閣開始，來熟手臺語漢字。加練幾張，保證免練甲煞，一寡會花去的字自然就學起來矣！閱讀佮練習若有夠，寫作就會變𠢕。你嘛會使照家己抑是學生的程度調整篇數，抑是仝款的篇目加練幾遍共練予熟。在你調整、在你決定。

　　感謝阮查某囝林芸瑄小姐，國立臺北藝術大學美術系畢業的青春藝術家幫我畫插圖。藝術性、藏佇圖裡的思考佮親切古錐的主圖攏是為著欲佮讀者較倚心。阮閣決定共逐篇主圖的邊仔，畫佮文章有相關的主題小圖典，通延伸學習佮增加師生對話，用簡單的線條佮圖形，予小小的圖有大大的妙用。臺語毋但媠閣趣味，阮想欲予臺語冊嘛有藝術感，閣有音、有字、有圖，攏總媠。

　　感謝文化部予我補助。足多謝何信翰教授等等的評審予我這个光榮，我才有出第二本冊為臺語拍拚的機會。感謝前衛出版社林文欽社長的支持、鄭清鴻主編的專業編輯，足濟文本、資料佮音檔連結幼路的工課，無主編袂使。伊專業的建議是我的大福氣。感謝我的寫作燈塔李勤岸教授做這本冊的顧問，予我閣較有信心，伊是我的恩師，一直關心我、指導我。感謝盧廣誠老師、陳憲國老師、鄭安住老師、林佳怡博士、甘佩玉小姐、蕭文如老師、鄭安秀老師，當初佇電子報予我的機會佮幫助。感謝守/ 酒臺語社的眾位老師佮沙龍晤的兄姊，這兩个倚心的讀冊會予我有寫作新文章的動力，嘛予我寶貴的建議。感謝顧怡君老師為我校稿，用全國賽閩南語字音字形金牌的實力予這本冊用字無重耽。感謝每一篇故事內底的親情五十、朋友、學生、厝邊隔壁，予我的文章足鬧熱。感謝我上親愛的阿母、伨我的兄姊、翁婿佮兩个貼心的寶貝查某囝，𪜶是我小宇宙的元神。佇我寫作的過程，天公的祝福佮上帝的恩典滿滿滿，我的性命攏是因為臺語，因為逐家，才會幸福閣美麗！