推薦序
【贊聲的話】無定著的Bōto，彎來斡去的文學路
顧謙
熟似王羅蜜多，是因為伊的筆名。上起先，看著面冊的「蜜多王羅」，頭敧敧毋知這是啥物，無偌久讀著詩刊的一首無意象詩，徛名「王羅蜜多」，頷頸才掠予正。毋過有一回參加文學座談，煞看著伊的名牌寫「王波羅蜜」，予我驚一趒。我踏倚去細聲問緣故，伊講，這是無定形的名字，正行王羅蜜多，倒轉多蜜羅王，按怎唸都無代誌。
我心內想，就是這款性素的作家，才會寫出這lō詼諧腫頷的文字。不而過，根據訪談，伊講並毋是自開始就按呢生，而且，話若欲講透機，頭前溪的水就流袂離。
原來，伊是戰後彼一、二十冬出世的囡仔。斯當時生活足歹過，欠食食（tsia̍h-si̍t）無娛樂，無代誌就走溪埔掠鰗餾，逐大栱仙（招潮蟹），舞甲規身軀漉糊糜仔，轉去到厝，阿毋雖罔毋甘摃囝，洗衫洗甲會齷齪（ak-tsak），就大聲詈（lé）,夭壽死囡仔，頭前溪無崁蓋啦！不而過，這款話足罕得，大部份攏是疼惜的言語，尤其是對學校轉來，阿母就問講考試幾分，老師有疼你無，閣紲落食暗，就講食這食彼較有營養，而且較臨十句台語就插一句日語。
講著國民學校，彼間海邊的庄跤學校，予伊印象上深的是，老師國語講袂輾轉，而且足愛講台語，拄著仔插一句日語。狡怪的，老師會駡歹囡仔厚讕頭，唱歌傷好聽，煞嫌疑偷食薰，才會變鴨形仔聲。
所致，伊從少年就足愛講台語，而且無禁無忌。伊講退伍佇南部食頭路，老的少年的，賣魚賣肉做穡的全台語，三教九流攏台語，予伊的台語詞愈豐沛。落尾，開會時陣，伊共會議資料一字一字唸台語，逐个聽甲會吐舌。
蜜多兄共我講遮濟，是欲說明伊的台語生活順利無礙，非常好運，這也致使伊開始投入台語文學創作就左捽正寫，各種文類、題材寫袂離。
窮實蜜多的寫作足晏（uànn）才起步。伊四十歲興做甆（huî）（陶藝），做甲予塗黏咧。五十歲愛畫圖，對寫實變超現實、抽象、自動性技法逐項來，四常舞甲規頭規面，一直甲六十才開始文學創作，起頭是華語詩，六十五無張持沐著台語文創作，這聲有額矣，閣親像活魚跳落深水，品無回頭直直泅直直去。
這就是母語的吸引力，一下現身予你仙擋擋袂牢。蜜多兄的台語寫作，七、八冬來，經常是佇咖啡廳、飲料店，共沿路看著、聽著、想著的，附相片寫落手機仔，發表佇面冊。伊講彼是上鮮沢的現流仔，因為多數是台語詩，阮就稱呼伊「現流仔詩人」。
不過這兩冬來，發現伊變款矣！伊已經決意共寫作的重心徙來小說。伊講，小說才會當予伊的母語全力發揮，共三教九流乞食羅漢的語言，無罜無礙用上紲拍的方式，親像水沖瀉出來。
有人講，上四就袂攝，你食老才寫小說，會當寫偌濟？蜜多兄卻是無煩惱。伊講，我上七猶會攝，而且精氣飽滇，一瀉千里，成做水池流出大海，我是一隻Bōto，直直駛直直去，彼是一个無的確的盡尾。伊講的閣親像腫頷，毋過誠是有士氣。
《詩王浪溜嗹》，佇伊十外本的著作內底算是誠特殊。首先，伊寫的是一个無身世的人物，有無定形的性素，捎無㨑的出頭，不時予人驚一趒的演出。
照蜜多兄起先的想像，這个浪溜嗹是毋是會接近魯迅所寫的「阿Q」？毋過寫無幾篇就感覺無仝矣！因為阿Q彼種龜龜鼈鼈，閣足愛瞪丹田的個性完全無法度參浪先生比較。
這个故事中的浪溜嗹雖罔浪蕩幌，毋過伊有學習上進的心，有人生的美夢。伊的人格是高尚的，伊嘛有正義感。
對這款形的人物，蜜多兄寫作的策略，是運用詼諧的手路，寫出浪溜嗹好笑閣令人同情，也予人尊敬的人生。
遮的故事文字，蜜多兄借用我的名字設立面冊，佇兩年中間，逐篇附圖畫發表。遮的作品也是現流仔，遮的現流仔毋是細尾魚，而且有腫腫的頷頸。伊共這个面冊的好友限佇一百个以內，連伊家己都無。聽講，伊遮的腫頷文，按贊的通常無超過三十个，不而過會有十个哈哈大笑，看起來是女性較濟。
另外，蜜多兄這擺的冊有參in細漢查某囝合作，予伊選三篇製造有聲圖畫冊，向望會當增加趣味性，予較濟人做伙入來詼諧有力的台語文學內底。
總講一句，蜜多兄這本《詩王浪溜嗹》是有深刻內容兼有趣味的冊，若講佇「現流仔詩人」之後，閣稱呼伊是「腫頷大師」，我想嘛無過份，逐家若有認同，噗仔聲共催落去！
導讀
《詩王浪溜嗹》，佇作者十外本的著作內底算是誠特殊。首先，伊寫的是一个無身世的人物，有無定形的性素，捎無㨑的出頭，不時予人驚一趒的演出。
照作者起先的想像，這个浪溜嗹是毋是會接近魯迅所寫的「阿Q」？毋過寫無幾篇就感覺無仝矣！因為阿Q彼種龜龜鼈鼈，閣足愛瞪丹田的個性完全無法度參浪先生比較。
這个故事中的浪溜嗹雖是蕩浪幌四界趖，毋過伊有學習上進的心，有人生的美夢。伊的人格是高尚的，伊嘛有正義感。
對這款形的人物，書寫的策略，是運用詼諧的手路，寫出浪溜嗹好笑閣令人同情，也予人尊敬的人生。
讀這本冊的朋友無需要用嚴肅的學習的態度來看待，因為這是佇荒譀中帶有正經的冊，是藉逐家心目中的無路用人來講有路用的代誌，這種代誌需要逐家放下裝備，佇笑詼中來敨開內心的綑縛。
另外，作者這擺的冊有參in細漢查某囝合作，予伊選三篇製造有聲圖畫冊，向望會當增加趣味性，予較濟人做伙入來詼諧有力的台語文學內底。
這本《詩王浪溜嗹》是有深刻內容兼趣味的冊，作者佇「現流仔詩人」之後，會使講是進一步成做「腫頷大師」矣！
【華語大意】《詩王浪溜嗹》，在作者十數本著作中顯然相當特殊。這書中寫的是一個身世不明，個性不定、言行無厘頭，荒誕不經的人物，這人物經常有讓人驚愕難以理解的演出。
照作者起先設想，這個浪溜嗹可能會接近魯迅的阿Q，可是故事發展過程中，很快就發現是截然不同的人物，因為阿Q那種卑劣扭捏、自我吹噓、精神勝利的個性，完無法和浪先生比較。
這故事中的浪溜嗹雖然四處閒蕩，生活形同流浪漢，但他有學習上進的心，有人生美夢。他的人格是高尚的，也有正義感。
對這樣的人物，書寫策略是運用誇張、詼諧的手法，寫出浪溜嗹好笑又令人同情，以及被尊敬的人生。
讀這本書的朋友切勿使用嚴肅的學習態度，因為這是在荒誕中顯見一本正經的書，是藉大家心目中的無用之人敘述有用之事，這事需要大家缷下裝備，在嘻笑怒罵中解開內在的束縛。
另外，作者首次和小女兒九方合作，請她撿選三篇製作繪本，期待能增添趣味，吸引更多人一起進入這詼諧有力的台語文學作品。
這本《詩王浪溜嗹》是有深刻內容兼趣味的書，作者在號稱「現流仔詩人」之後，可謂進一步化身「腫頷大師」了！
自序
我自少年就足愛講台語，而且無禁無忌。退伍佇南部食頭路，老的少年的，賣魚賣肉做穡的全台語，三教九流攏台語，予我的台語詞愈豐沛。落尾，開會時陣，我共會議資料一字一字唸台語，逐个聽甲會吐舌。
閣再講這，是欲說明我的台語生活順利無礙，非常好運，這也致使我開始投入台語文學創作就左捽正寫，各種文類、題材寫袂離。
窮實我的寫作足晏才起步。四十歲興做甆（陶藝），做甲予塗黏咧。五十歲愛畫圖，對寫實變超現實、抽象、自動性技法逐項來，四常舞甲規頭規面。一直甲六十才開始文學創作，起頭是華語詩，六十五無張持沐著台語文創作，這聲有額矣，閣親像活魚跳落深水，品無回頭直直泅直直去。
這就是母語的吸引力，一下現身予你仙擋擋袂牢。我的台語寫作，七、八冬來，經常是佇咖啡廳、飲料店，共沿路看著、聽著、想著的，附相片寫落手機仔，發表佇面冊。這是上鮮沢的現流仔，因為多數是台語詩，文友就稱呼我「現流仔詩人」。
不過這兩冬來變款矣！我已經決意共寫作的重心徙來小說。因為小說才會當予我的母語全力發揮，共三教九流乞食羅漢的語言，無罜無礙用上紲拍的方式，親像水沖瀉出來。
天天爆殺 
今日66折 
博客來
博客來
博客來
博客來
博客來
常見問題
線上客服
寫信給客服